De geschiedenis van CV de Heiknuiters

UT BEGÎN
Al in 1960 woort in Altwieërthei-j aandacht bestieëdj aan de veering van vastelaovundj. Zoeë deeje al veûr dae tiêd mieërdere groepe of buurte mej aan de vastelaovundjoptocht vanne Rogstaekers in Wieërt. Inne Hei-j, zoeë-as ze in Wieërt zegke, begos de georganiseerdje vastelaovundj in november 1960. Nao ‘n vergadering vanne gezamelike vereineginge beej Graad Rietjes, tegenoeëver de kêrk, woord d’r nog gezellig gekaldj doeër ‘n aantal minse en kwoom ‘t gesprek oppe vastelaovundj.

Emes haaj ‘t gerucht gehuuërdj det ze op Kieëntj ‘n vastelaovundjvereineging op woeëje richte. Waat ze op Kieëntj kinne motte vae inne Hei-j ouch kinne, motte ze gedachtj hebbe. Nog daezelfdjen aovundj woord aafgesproke det Jan Creemers, Harrie Janssen, Jan Kusters en Ties Rietjens ‘n aantal minse inne Hei-j zoje pôlse of ze zin haje um dael oet te maake van de Raod van Ellef van ‘n op te richte vastelaovundjvereineging. ‘t Enthousiasme waas zoeë groeët dat d’r zellefs eenkel resêrves koste waere aangesteldj.

Zoeë snêl as d’r ‘ne Raod van Ellef waas, zoeë meujzaam waas de kuuës vör de preêns. As veûrgânger in de vastelaovundj dachte ze in ieërste instânsie aan ‘ne neet al te jonge preens en al gaw geenge in ‘t dörp de name roond van Baks Sjang, Sjeng van Lier, Wullem Cuypers en Toeta Sjeng. Weem zooj as ieërste hieërser vanne Hei-j oetgerope waere?De ieërste Vorst vanne Heiknuiters, zoeë-as de vereineging intösse waas geduîptj, mot toch waal wat zeenewechtig gewore zeen naodat de eine nao den ângere kandidaat um de ein of ânger duûster rieëje te kinne gaaf um toch mer van ‘t preensschap aaf te zeen.

Oppen aovundj van ‘t preensebâl ging um hallef zeve de tillefoon beej de Schut. Toen de kastelein, Harrie Lenaers, opnoom woord hae doeër Vorst Harrie gevraogdj of ziene broor Jaan meschien dao waas. Gelökkig waas det ‘t gevâl, want Jaan kreeg geliêk de vraog veûrgelagdj of hae um hallef acht beej kefee de Paol kos zeen um dao um neuge oor as preens oetgerope te waere.Völ tiêd um dao over nao te deenke haaj hae neet. Gelökkig waas det ouch neet noeëdig, zoeëdet hae kos waere oetgerope tot ieërste preens vanne Hei-j. Daomej waas ‘t oetrope van ‘ne preens ouch geliêk geredj.

Dae aovundj ware e groeët aantal inwoeëners vanne Hei-j nao de Paol gekome um te zeen weem oet de doeës zooj kome. Jao letterlik oet de doeës, want dao-in haje ze Jaan intösse gestoptj. ‘t Waas de bedoeling det ze nao ‘t binnebreenge van de ieërste hieërser de doeës met inhaod oeëver ‘n lei-jer op ‘n ein maeter breid en ongevieër veer maeter hoeëg platfôrm zoje höffe, um hem vanaaf di-j plaats veûr te stelle aan de bezeukers. Gelökkig vör de nôwwe preens waas de doeës in ‘n dusdanige kwaliteit det dit veûrneme neet doeërging. Dao-op woeërd beslote de doeës dan mer op ‘n lei-jer doeër de zaal te drage. Det ging good, tot halverwieëge de zaal de lei-jer ‘t begoof.Mer effekes nao neuge kos vorst Harrie de ieërste hieërser oeëver de Heiknuiters en Heiknuiterinnekes, Preens Jaan de ieërste prizzentieëre.

Zoeë-as ‘ne gooje preens betaamtj mos hae ouch e kort woeërd richte tot zien ôngerdane. Gezeen ‘t korte tiêdsbestek waat aan zien beneuming veûraaf waas gegânge, waas ’t begriêpelik det Jaan zich neet op zien taak haaj kunne veûrberei-je. Ouch dit bleek gein probleem vör de nowwe preens, want in plaats van ‘ne spietsj verteldje hae gewoeën ‘n aantal sappige moppe.‘t Ieërste optraeje van de vastelaovundjvereineging, de Raod van Ellef met echte mötse en ‘ne Preens waas gezeen de reaksies op dae aovundj e groeët suukses. ‘t Begîn van de Heiknuiters van Altwieërthei-j.
(Uut ‘t jubileumbukske 3×11 jaor)

DE NAAM HEIKNUITERS
De vastelaovuntjveerders vanne Hei-j (Altweerterheide) staon bekintj as de Heiknuiters. Ondânks det in ut woeërdebook vanne Nederlandse taal vör ut woeërt heikneuter “heibewoner” stieët, beteîkendje dit woeërt vör de Wieërtenaare unne schêltjnaam vör de minse oet de Hei-j. Ze duudje doame-j op ut daagelikse werrek van völ inwoeëners uut oeës dörrep inne lântbouw. Ut woore vör hun de boore, de pummels oet de Hei-j.

Um heej toch neet te völ aan herinnertj te waere, woort als symbool vör de vereineging mer de twieëdje beteikenis van ut woeërt heikneuter aangehouden en det waas ut zângveugelke, ouch heikneutje geneumtj.

As de ieërste preens op 9 fibberwari in ut huuwelik traetj es nateurlik ouch de vastelaovuntjvereineging vanne parti-j. Waat ligt d’r mieër vör de hânt as kado vör ut broeëdspaar dan unne heuse heiknuiter? Mer wi-j kojje aan zoeë un veugelke. Zieëker in ut hértje van de weentjer. Zoeë-as jae van vastelaovuntjveerders moogtj verwachte hoofdje dit gein groeët probleem te zeen. Jaan en zien körsverse vrâw Nellie kreege unne echte kenaarie.

(Uut ut jubileumbukske 3×11 jaor)