Crosse
Edwin mós nao Pruûses. Hae haaj dur un stevig tempo inzitte want in Pruûses moogse toch zoeë haard ri-jje asse wils. Mer det waas neet veur alle weêge zoeë. Un tiêdje later kreeg hae un boete inne bös. Hae mós zich gaon melde en dur woort un breefke op zien ri-jjbewies geplektj en now mocht hae unne maondj lânk neet in Pruûses ri-jje.
Mer Edwin waas neet de einige Heiknuiter dae unne maondj lânk neet in Pruûses mocht ri-jje. Rick ging Maria en Iris van ut vleegveldj hale en hae waas al aan de late kânt dus dur woort good doorgereejje en ouch hae kreeg unne breef inne bös um zich te gaon meldje en ouch hae kreeg un pepeerke op zien ri-jjebewies geplektj. Zeen zeuj de toekomstige Max Verstappes vanne Hej?
Stekke
De Heiknuiters en de Bore ginge nao de resepsie van de Zweeloeere op Luuëke en nao de Vêrkusköp op Moesel. De vereiniging ging met de bös en de Bore ginge met heur eîge wages, dan koste zeuj mekkelik heur instrumente mej neme. Giel haaj zien dikke trom beej zich en ouch nog extra stekke, want dich kins mer noeëts wete waat dur allemaol kan gebeure, mer umdet hae same reej met Petra woort dur alles umgelaaje nao de wage van Petra.
Wi-j ze beej de Zweeloeere kwome en Giel zien trom paktje kwoom hae dur achter detter zien trommelstekke nog inne wage inne Hej haaj ligke. Mer weer met Petra trök nao de Hej. Neet eederein vanne Heiknuiters haaj dit mej gekrege dus de jeugdraod stong al oppe buuhn sónger meziek. De groeëte raod woort waal begeleidj door de Bore, want Giel waas weer trök met zien stekke.
Trein
Femiêlie Kluitmans ging ‘n weekend nao Drenthe. Arien , Sandra, Lynn en Cas haaje vriêdes al vreej, Daphne haaj unne lange daag oppe Uni en kwoom métte trein nao Drenthe. Stasie Meppel bleek de mekkelikste stasie um heur op te hale. De femiêlie stóng um half acht in Meppel. De intercity reej in volle vaart veurbeej en Arien zag as grepke: “dao gieët Daphne”.
Cas kos ut grepke neet waardere, want hae haaj honger. Dan gieët de tillefoon *Daphne*: “mam ich zit inne verkieërdje trein, ich heb de intercity gepaktj in plaats vanne de stoptrein, noow és mien eindpuntj Assen”. De femiêlie és mer nao Assen gereeje um dao Daphne op te pikke.
Mer Daphe haaj heur lesje nog neet gelieërdj. De NS waas aan ut spoor aan ut wêrke richting Eindhoven/Tilburg, waat beteikendje det Daphne over Remundj trök mós kome van Nijmegen nao Wieërt. Dus de stoptrein nao Venray pakke en dao overstappe. Zoeë gezagdj zoeë gedaon, mer waat bleek Daphne waas vergete uut te stappe in Venray en waas weer op weêg trök nao Nijmegen. Overstappe blieftj toch un dingske.
Voetballe
De veterane vanne Hej móste in juni heur léste voetbalwédstriêd van ut sezoên speule. Zeuj woore al vreug op paad want de wédstriêd woort gespeuldj in Boukoul ( beej Remundj ). Zeuj haaje de hieële wédstriëd sónger wisselspeuler gespeuldj want Ton waas nao Boekel gereeje! Boekel ligktj beej Gemert 150 km op en neer.
Flesse-aktie
KVW ging veur un flesse-aktie door ut dörp. Ouch de Savelstraot kwoom aane beurt. Evie, ouch leiding vanne KVW, belde aan beej un hoês in de Savelstraot, mer dur deej nemes ope. De rest vanne KVW-leiding zag un bitje lachendj det zeuj ut nog mer ens mós belle en efkes mós bliêve wachte wis dur ope gedaon woort. Later veel beej Evie pas ut kwartje det zeuj beej Paul aane deur gestange haaj, mer dae waas netuerlik neet thoês, hae waas mej aan ut hellepe met de flesse-aktie!
BAH
Jan haaj met wat vrijwilligers ’t podium opgebouwdj. Dus koste de speulers dao saoves vör de ieërste kieër gaon oefene. Veur det ze de buun opginge, deej Jan nog efkes ’n inspectie um te kieke of alles good waas. En flats dao gleej hae uut, bekans met zien gezicht plat oppe groond.
Haaj mich dao de hoond van Monique vanne Paol smiddes toch hoeëge noeëd gehadj en de boetedeur net neet gehaaldj. Met as resultaat ’n houp oppe buun. En as dejje dae hoond kintj, dan weijje det det dus ‘ne royale houp waas!
Körsman
Geer haaj gesolliciteerdj vör körsman, mer helaas waas hae aafgeweze, zien haor en baard ware net wat te kort. Dan mer d’r aaf mét dae hândel en nao de kapper um die lange lokke d’r aaf te laote knippe. Hae keumtj thoês zeet Anita: det is waal hieël kort! Dan hoof ich d’r tenminste weer ’n jaor neet haer te gaon. Zooj hae volgendj jaor weer sollictere vör körsman? Misschien löktj ’t dan waal.
Foute körskleî-jer
Dit jaor deej de hermeni-j neet ’t pak aan mer foute körsklei-jer. In november waas dit aafgesproke. Allemaol haaje zeuj zich uitgeslooftj en waas ’t de twieëdje körsdaag ein boont gehieël. Eine veel in ’t gehieël in zien zwerte pak op: Berry. Gaw uut de zaal ein körsmöts gehaaldj zoeëdet hae neet opveel binne de hermeni-j.
Hinne
Uutgeraekendj op twieëdje körsdaag waas ’t hinnevoor beej Peter en Ellen op. Det vonge ze toch waal erg zielig vör die hinne veural met körsmes. Peter haaj ’n grandioos idee, misschien is Cranebroeck waal ope, dan koupe we det dao waal efkes. Dus op de website gekeke. Beul waas tow mer Opglabeek waas ope. Öngertösse stong ’t vleîs te pruttele op ’t fornuis. Dus dao woord de auto gepaktj en d’r haer gevare. ’T Waas d’r waal drök mer ’n parkierplaats waas snel gevonge. Veur de deur stonge gein winkelkerkes mieër, dao moste ze op wachte tot d’r klante trök de winkel uut kwame, die hun aankoupe al gedaon haaje, det doôrdje ‘n paar minute.
Twieë euro inne ker en hup nao binne. Dao waas ’t zoeë óntieglik drök det de minse beej de ingang al stonge te wachte met hun kerre aafgepriestj körsspul um aaf te raekene. Dao haje Peter en Ellen gein zin in um 2 oor in die reej te gaon staon. Dus die ker mer êrges in ‘ne gangk gedumptj, langs die ri-jje aafgeschraveldje en met ‘ne roeëje kop weer nao boete. Dao nog efkes inne ri-j gestânge um t parkeerterrein aaf te kome en toen snel trök nao hoês. Conclusie: geîn hinne voor, 2 euro weg, ’n halve tank leeg, 1, 5 oor wieter. Mer ’t vleîs waas beej thoês komst waal al gaar.
Moondstök
Lambert gieët twieëde körsdaag mét koffer en tas nao de Paol vör ’t körskonsert. Dao aangekoome vingtj hae zien moondstök neet.’t Zitj neet op zien plek in ’t koffer. Lambert gieët es eine haas trök nao hoês zónger ieërst te kieke in zien tas of koffer. Es hae thoês keumtj luîptj hae nao de graasj um dao te zeuke. Marlie zeet tege Nadine: waat is hae vergaete of kwiêt? Nadine zeet lachendj : zien moondstök ?! En jaowaal hae waas zien moondstök kwiêt, mer thoês nerges te vînge. Mer weer trök nao de Paol. Nao wat zeuke , vîngtj Lambert ’t moondstök in zien tas.
Puur geneete 5 dec
Beej de femiêlie Kluitmans woore de loeëtdjes mét name getrokke en eerder haaj vör zeen lotgeval ein schoeën surprise gemaaktj. Ariën haaj ein idee : ich doon de kadoos in ein doeës en vul die aaf met pur. Schoeën papeêrke der om en veerdig. Pakskes aovundje kreeg Sandra ein schoeën ingepaktj kadoo. Ze schuddeltj er mét mêr ze heeûrdj niks rammele dus det is good ingepaktj. Jao waal ût papeerke eraaf en de doeës ope gemaaktj. Surprise! Eine blok pur! Sandra begint de kadoos uut de pur te päölke. Mer det veel niet meij want de pur waas nog neet overâl haard. Ein plekkerige bende in huize Kluitmans. Gelökkig haaj Ariën de kadoos ieërst in ein plastic buulke gedaon en dus kos Sandra PUUR geneete van heur kadoos.
BBQ
De aod preense hebbe ‘n groeëte aktiviteit : BBQ mét ontgreuning vanne nowwe aod preens. BBQ weurtj de lêste jaore beej Niek gehaoje. Obbéns gieët de tillefoon : met slachter Heijkers, ich staon heej in Altwieërt aanne kêrk mét eine BBQ. Mér ich zeen heej neemes. Det kloptj zeet Niek, gae mót nao de femiêlie Aendekerk koome oppe Wijffelterbrookdiêk.
Körsboum
Renee heet ’t hoês van Piet gekochtj en veultj zich dao thoês en now waas ’t tied om eine kôrsboum te hale. Ze ginge door de graasj port nao boete. De dochter moog op de knóp dowwe vanne electrische port. En op zeuk nao eine kôrsboum . Boum gekochtj en trök nao hoês. Thoês aangekome , aafstand bedeêning vanne port neet inne auto en oppe veurdeur zoote de kanon grendels al. Dus ze koste der neet in. Waat now?? Eine sloôtemaaker uut Stevenswieêrt mós koome. Hae kreeg de deur nao ein half oor pongele ope en 100 euro ermer. Mer now kos de boum nao binne.
Völ water en toch eine kater
Peter waas beej Ilse aan ’t klusse en dao mós ein gaat geboortj waere door de fundering. Effe maete. Dao zitj de waterleîding en dao de stroûm. Dao kan det mekkelik tösse door. Peter begintj te boore en al snel heet d’r ein water gekeuldje boor. ’t Water gieët alle kânte op. De hoofdkraan tow dreije haaj gein zin. Dao kwaom gein water uut de kraan. Dan mer aan ’t belle. Ieërst de gemeindje en toen de WML. De stevele aan en wachte. Dao kome ze , ieërst de kraan inne weeg tow gedreî-jt mer ’t water bleef stroûme.
Toen de ângere kraan opgezochtj, dae zoot ein bitje verstoptj mer toch gevonge. Tow gedreî-jt en jaowaal ; d’r kwaom gein water mieër uut ’t hoês van Ilse, zellufs de hieël naober haaj gein water. Wie ’t water gezaktj waas koste ze beginne mét ’t make. Ieërst de leîding vreej make. Waat bleek de leîding leep schuun en neet recht! De monteur haaj nao twieë en ’n half oor de leîding gemaaktj en woor d’r weer water. De raekening kwoom later: van al det water toch eine kater.